Tensionet mes rebelëve Huthi dhe Arabisë Saudite kanë hyrë në një fazë të re, pasi grupi i mbështetur nga Irani ka shtuar sulmet me raketa ndaj objektivave saudite, duke rritur frikën për një përshkallëzim të konfliktit në rajon.
Sipas CNN, javën e kaluar, Huthit kërcënuan se do të nisnin një fushatë sulmesh kundër anijeve saudite në Detin e Kuq nëse nuk hiqet bllokada e vendosur ndaj Jemenit, transmeton Klankosova.tv.
Më pas, ata pretenduan se goditën dy anije cisterna saudite, ndërsa Arabia Saudite konfirmoi se të paktën njëra ishte goditur dhe u kundërpërgjigj me sulme ajrore ndaj portit të Hodeidah, i kontrolluar nga Huthit.
Të shtunën në mëngjes, rebelët lëshuan raketa balistike drejt dy provincave saudite, përfshirë Jizanin, një qytet me rëndësi strategjike për eksportin e naftës dhe infrastrukturën energjetike të Arabisë Saudite.
Rebelët Huthi, të cilët kontrollojnë kryeqytetin Sanaa dhe pjesën më të madhe të bregdetit të Detit të Kuq që nga viti 2014, kanë mbijetuar pavarësisht ofensivës saudite të nisur në vitin 2015.
Me mbështetjen e Iranit dhe grupeve aleate, ata kanë vazhduar sulmet ndaj Arabisë Saudite dhe Emirateve të Bashkuara Arabe, si dhe kanë goditur Izraelin me raketa balistike në mbështetje të Hamasit që nga viti 2023.