Presidenti i FIFA-s, Gianni Infantino, ka sqaruar publikisht bisedën e zhvilluar me presidentin amerikan Donald Trump lidhur me rastin e sulmuesit të SHBA-së, Folarin Balogun, pas debatit të krijuar rreth kartonit të kuq dhe pezullimit të tij në Kupën e Botës.
Rasti i Balogun është bërë temë e gjerë diskutimi pasi ai u ndëshkua me karton të kuq në ndeshjen ndaj Bosnjë-Hercegovinës në fazën e 1/16 së finales, ndërsa më pas FIFA vendosi t’i heqë pezullimin me një ndeshje, duke i mundësuar aktivizimin në ndeshjet pasuese.
Ky vendim shkaktoi reagime në opinionin sportiv dhe kërkesa për sqarime, përfshirë edhe nga Federata e Belgjikës, e cila shprehu shqetësime për ndikimin e mundshëm në garë.
Në këtë kontekst, Donald Trump deklaroi se kishte diskutuar çështjen me presidentin e FIFA-s. Infantino, nga ana e tij, konfirmoi kontaktin, por theksoi se proceset vendimmarrëse në FIFA janë plotësisht të pavarura.
“Organet gjyqësore të FIFA-s janë të pavarura dhe kjo është thelbësore për integritetin e futbollit. Po, kam biseduar me Presidentin e SHBA-së dhe i kam shpjeguar se vendimet merren nga struktura të pavarura dhe në përputhje me procedurat zyrtare,” u shpreh Infantino.
Ai shtoi se shpesh vendimet e komisioneve disiplinore mund të jenë të debatueshme, por ato duhet të respektohen.
“Ndonjëherë pajtohem, ndonjëherë jo, por gjithmonë i respektoj vendimet e tyre,” deklaroi kreu i FIFA-s, duke theksuar se pavarësia e organeve disiplinore mbetet parim i pandryshueshëm i institucionit.