Një numër i madh i të dyshuarve që kërkohen nga Policia e të tjerë të dënuar nga Gjykatat arrijnë ta shijojnë lirinë nga arratia. Gazeta Sinjali në vazhdimësi ka raportuar për arrestimin e personave të akuzuar për vepra të ndryshme penale, por që të cilët kanë ikur nga duart e drejtësisë.
Në 24 orët e fundit janë arrestuar disa persona të kërkuar dhe në mesin e tyre është edhe një 60-vjeçar nga Peja.
Siç mëson Sinjali bëhet fjalë për Azem Mavraj, i cili po kërkohej në bazë të urdhëresës së Gjykatës Themelore në Pejë, pasi ishte dënuar për veprën penale “Uzurpim i paligjshëm i pronës”.
Mavraj ishte shpallur fajtor dhe ishte dënuar me 6 muaj burgim, por deri më dje ka qenë i lirë, derisa Policia arriti ta arrestojë në rrugën “Azem Lukaj”.
Pas ndalimit, i dyshuari u shoqërua për në Gjykatë, ku pas përfundimit të procedurave u dërgua në njërën nga qendrat korrektuese për të vuajtur dënimin.