Një nga banorët më të pazakontë të oqeaneve fsheh karakteristika që e bëjnë unik në botën shtazore.
Oktapodi është një ndër krijesat më interesante të botës detare, jo vetëm për inteligjencën e tij, por edhe për veçoritë e rralla biologjike. Ai posedon tre zemra – dy prej tyre pompojnë gjakun drejt gushëve për oksigjenim, ndërsa zemra e tretë e shpërndan atë në pjesën tjetër të trupit.
Ndryshe nga shumica e gjallesave, gjaku i oktapodit është blu, falë hemocianinës, një proteinë me bazë bakri që transporton oksigjenin dhe i mundëson të mbijetojë në mjedise me temperatura të ulëta dhe nivele të pakta oksigjeni.
Një fakt po aq interesant është se gjatë notit, zemra kryesore e oktapodit ndalon përkohësisht së rrahuri. Pikërisht për këtë arsye, ai preferon të lëvizë duke u zvarritur në fund të detit, në vend që të notojë për distanca të gjata.
Për shkak të inteligjencës së zhvilluar, aftësisë për t’u kamufluar dhe anatomisë së pazakontë, oktapodi vazhdon të konsiderohet një nga krijesat më misterioze dhe më të studiuara të botës nënujore.