Një aksion i Antidrogës në Pikën e Kalimit Kufitar në Kullë i zhvilluar të mërkurën në mbrëmje, ka rezultuar me arrestimin e një personi të dyshuar për shitblerje të drogës dhe sekuestrimin e rreth 7 kg heroinë. I dyshuari është një 74-vjeçar, i cili tashmë ndodhet nën masën e ndalimit policor.
Sinjali ka mësuar ekskluzivisht se i dyshuari që ra në prangat e Policisë është Sadik Tahiraj, i cili dyshohet se kishte për qëllim që ta transportonte drogën nga Kosova në Mal të Zi.
Droga që iu kap të dyshuarit brenda veturës, sipas informacioneve të para kap vlerën e rreth 175 mijë eurove.
Gjatë kontrollit të kryer nga ana e Policisë, janë sekuestruar edhe dy telefona celularë dhe rreth 600 euro para të gatshme.
I dyshuari është arrestuar dhe është shoqëruar në stacion policor për intervistim, ku me urdhër të prokurorit më pas është ndaluar për 48 orë.
“Më 06.03.2024, rreth orës 19:00, në PKK-Kullë, kanë ndaluar veturën dhe gjatë kontrollit në brendësi të veturës janë gjetur dymbëdhjetë paketime, qe dyshohet të jenë substancë narkotike e llojit heroinë me peshë të përgjithshme 6314 gram (6 kg e 314 gr), kurse nga i dyshuar S.T., (viti i lindjes 1949, mashkull kosovar) janë konfiskuar edhe: dy telefona mobil dhe 585 euro. Policia, nën autorizimin e prokurores kanë kryer kontroll edhe në shtëpinë e të dyshuarit ku janë gjetur dhe sekuestruar edhe dëshmi tjera relevante për rastin, si: makineri për presimin e lëndëve narkotike, mikser për përzierje të substancës narkotike, 700 gr heroinë dhe dëshmi tjera. Mendohet se vlera e lëndëve narkotike të konfiskuara është rreth 175 000 (njëqind e shtatëdhjetë e pesëmijë) euro”, thuhet në njoftimin e Policisë.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.