Reagime të shumta ka ngjallur deklarata e presidentit francez, Emmanuel Macron.
Ai sot paralajmëroi se do të ketë masa ndaj Kosovës e Serbisë, nëse ato nuk sillen me përgjegjësi në dialog.
Ai tha se Franca të hënën do t’i rishikojë zotimet që i ka bërë për çështje ekonomike dhe politika të vizave.
“Franca dhe Gjermania i kanë bërë premtimet e tyre për politikat e vizave dhe çështjet tjera ekonomike, të cilat do të rishikohen nëse të dy palët nuk sillen me përgjegjësi. Ne duhet të jemi tejet kujdesshëm në këtë drejtim, posaçërisht kur stabiliteti i Ballkanit Perëndimor është në rrezik”, tha Macron.
Lidhur me mundësinë e shqyrtimit të liberalizimit të vizave për Kosovën, ka folur deputeti i Lëvizjes Vetëvendosje, Agon Batusha.
Ai thotë se s’do të ketë shqyrtim të liberalizimit të vizave dhe se kjo çështje është e përfunduar e hyn në fuqi me 1 janar.
“Nuk mendoj që liberalizimi i vizave do të rishqyrtohet. Kjo çështje është e përfunduar dhe me 1 janar do të hyjë në fuqi”, shprehet Batusha.