Drama në botën e showbizit shqiptar ka marrë një tjetër kthesë të papritur. Opinionistja e njohur e televizionit, Neda Balluku, ka bërë hapin përfundimtar drejt ndarjes nga bashkëshorti i saj, Ogren Balluku, vëllai i ministres së Infrastrukturës dhe Energjisë, Belinda Balluku.
Pas më shumë se dhjetë vitesh martesë, çifti që dikur konsiderohej një nga më të qëndrueshmit dhe më të dashurit për publikun, po i jep fund historisë së tyre të gjatë të dashurisë.
Sipas burimeve të sigurta për VoxNews.al, kërkesa për divorc është depozituar zyrtarisht në Gjykatën e Tiranës gjatë ditës së hënë, duke shënuar kështu fundin e një kapitulli të rëndësishëm për çiftin.
Mësohet se vendimi i Nedës ka ardhur pas muajsh të tërë përpjekjesh për të shpëtuar marrëdhënien, e cila prej kohësh po përballej me tensione dhe kriza të brendshme.
Të afërm dhe miq të çiftit kanë treguar se problemet mes tyre janë bërë të dukshme prej disa kohësh, megjithëse ata kanë preferuar t’i mbajnë larg syrit të publikut, duke ruajtur privatësinë e familjes dhe veçanërisht të fëmijëve të tyre.
Historia e dashurisë së Nedës dhe Ogrenit ka qenë një ndër më të ndjekurat në ekranet shqiptare. Ata u njohën në vitin 2010, gjatë qëndrimit të tyre në shtëpinë më të famshme në Shqipëri — Big Brother Albania.
Fillimisht si dy konkurrentë që ndanin hapësirën e një loje televizive, ata shpejt u bënë protagonistë të një romancë që u përjetua nga publiku në kohë reale.
Marrëdhënia e tyre u shndërrua në një nga historitë më të pëlqyera të formatit, duke i bërë të dy personazhe të dashur për publikun shqiptar edhe pas daljes nga loja.
Pas disa vitesh lidhjeje, çifti kurorëzoi dashurinë e tyre në martesë në vitin 2015.
Nga kjo bashkim kanë lindur tre fëmijë: dy djem, Serzh dhe Zai, si dhe vajza e tyre e vogël, Suzie Ann, të cilët kanë qenë gjithmonë në qendër të vëmendjes së Nedës, e cila shpesh ka ndarë momente të ngrohta familjare me ndjekësit e saj në rrjete sociale.
Pavarësisht angazhimeve të shumta profesionale si opinioniste dhe figurë mediatike, Neda ka qenë e njohur për mënyrën se si ka ruajtur ekuilibrin mes jetës publike dhe asaj familjare.
Megjithatë, duket se pas shumë vitesh përpjekjesh për të mbajtur gjallë raportin, marrëdhënia e tyre ka arritur një pikë pa kthim.
Të dy kanë zgjedhur të ecin përpara ndarazi, duke respektuar njëri-tjetrin dhe mbi të gjitha, duke u përqendruar në rritjen dhe mirëqenien e fëmijëve të tyre.
Burimet bëjnë të ditur se procesi gjyqësor pritet të zhvillohet me diskrecion maksimal, për të shmangur çdo lloj ekspozimi publik apo spekulimi mediatik.
Divorci i Neda dhe Ogren Ballukut shënon fundin e një prej historive më të komentuara të dashurisë në showbiz-in shqiptar.
Nga një njohje e papritur brenda një reality show, në një familje të ndërtuar me dashuri dhe përkushtim, historia e tyre mbetet një kujtim i një dekade të tërë që ndjekësit do ta kujtojnë me nostalgji.
Për momentin, as Neda dhe as Ogreni nuk kanë bërë një deklaratë publike mbi ndarjen, duke zgjedhur heshtjen si mënyrën më të qetë për të përballuar këtë periudhë të vështirë në jetën e tyre personale./ORAinfo/