Njerëzit që konsumonin më shumë gjalpë kishin një rrezik 15% më të lartë vdekjeje krahasuar me ata që konsumonin më pak
Një studim i kohëve të fundit i Harvardit ka treguar se gjalpi në fakt nuk është aq i shëndetshëm sa besohet dhe se zëvendësuesi më i mirë i tij është në fakt vaji bimor.
Ky është sigurisht një lajm i keq për dashamirësit e gjalpit, pasi hulumtimet kanë treguar se konsumi më i lartë i gjalpit rrit rrezikun e vdekshmërisë, ndërsa konsumi më i lartë i vajit vegjetal e zvogëlon këtë rrezik.
Pjesëmarrësit në studim u ndanë në grupe sipas sasisë së gjalpit dhe vajrave bimorë që raportuan se konsumonin, dhe vdekshmëria e tyre u monitorua gjatë një periudhe deri në 33 vjet.
Njerëzit që konsumonin më shumë gjalpë kishin një rrezik 15% më të lartë vdekjeje krahasuar me ata që konsumonin më pak.
Në të kundërt, ata që konsumonin më shumë vajra bimorë kishin një rrezik 16% më të ulët vdekjeje krahasuar me ata që konsumonin më pak.
Një studim i botuar në revistën JAMA Internal Medicine zbuloi gjithashtu se një konsum më i lartë i gjalpit rriti rrezikun e vdekjes nga kanceri, ndërsa një konsum më i lartë i vajrave bimorë uli rrezikun e vdekjes nga kanceri ose sëmundjet kardiovaskulare, të tilla si goditja në tru ose ataku në zemër. Vajrat bimorë të shoqëruar me këto efekte të dobishme janë vaji i ullirit, i sojës dhe i kanolës.
– Gjalpi nuk përmban pothuajse asnjë acid yndyror esencial dhe ka një përqindje të moderuar të yndyrës trans – lloji më i keq i yndyrës kur bëhet fjalë për sëmundjet kardiovaskulare – tha studimi.
Nga ana tjetër, vajrat bimorë janë të pasur me antioksidantë dhe yndyrna të pangopura.
– Pak gjalpë herë pas here për shije nuk do të ishte problem, por për një shëndet më të mirë, përdorni vajra bimorë të lëngshëm sa herë që të jetë e mundur – si për gatim ashtu edhe për përdorim në tryezë – shtojnë ata në shpjegim.
Gjalpi është i pasur me yndyrna të ngopura – një substancë që mund të rrisë nivelet e kolesterolit dhe rrezikun e sëmundjeve të zemrës dhe goditjes në tru.
Ushqime të tjera të pasura me yndyrë të ngopur përfshijnë copat yndyrore të mishit, salsiçet, byreku, djathi, salca e kosit, akulloret, çokollata, biskotat, tortat, pastat dhe disa ushqime të kripura si kokoshka, etj.