Diplomati austriak, Wolfgang Petrisch, thotë se Brukseli ka për synim që gjatë këtij viti të arrijë sukses në arritjen e marrëveshjes mes Kosovës dhe Serbisë.
Ai në një intervistë për Kosovo Online, thotë se kjo çështje është e rëndësishme edhe për SHBA-në, Gjermaninë e Francën në veçanti.
Në lidhje me Asociacionin, Petrisch tha se Kurti nuk mund ta refuzojë Asociacionin.
Kjo për shkakun se sipas Petrisch, parimi i së drejtës ndërkombëtare e thotë qartë se marrëveshjet e nënshkruara duhet të respektohen edhe nga qeveritë pasardhëse.
“Marrëveshjet e dakorduara duhet të respektohen, kështu që edhe Prishtina duhet ta respektojë atë parim. Kurti mund të thotë se nuk e dëshiron Asociacionin në një mënyrë të caktuar, por nuk mund ta refuzojë themelimin e Asocionit. Parimi i së drejtës ndërkombëtare dhe shteteve ligjore është se marrëveshjet e nënshkruara duhet të respektohen edhe nga qeveritë e ardhshme. Pa këtë, nuk do të kishte marrëdhënie ndërkombëtare”, tha ai.