Kërcënimi me mjete shpërthyese në Aeroportin Ndërkombëtar të Prishtinës “Adem Jashari” alarmoi organet e rendit sonte. Pas kontrolleve të kryera rezultoi se kërcënimi ishte i rremë.
Lajmin për Sinjalin e ka konfirmuar zëdhënësja e Policisë për rajonin e Prishtinës, Flora Ahmeti.
“Informata është trajtuar nga ana e Policisë. Pas kontrolleve të kryera nga njësitet kompetente, nuk është gjetë asgjë e dyshimtë.
Njësitet policore janë tërheq nga ajo zonë, ndërkohë që hetuesit kanë filluar punën për zbardhjen e të gjitha rrethanave që ndërlidhen me këtë rast”, tha Ahmeti.
Ndryshe, alarmet për bombë janë shpeshtuar periudhën e fundit.
ANP “Adem Jashari” ishte cak i kërcënimeve me bombë edhe në dhjetor të vitit të kaluar ku një mesazh në gjuhën arabe kishte shkuar në emailin e Aeroportit dhe kishte ngritur në këmbë të gjithë.