Sytë janë ndër organet më të ndjeshme të trupit dhe shpeshherë përballen me një sërë problemesh shëndetësore që ndikojnë si në shikim, ashtu edhe në cilësinë e jetës. Ndër shqetësimet më të zakonshme është ndjesia e presionit të lartë në sy, që shoqërohet me dhimbje të mprehta dhe tension të brendshëm.
Ky problem, që shpesh herë nënvlerësohet, mund të jetë sinjal i gjendjeve të ndryshme shëndetësore dhe kërkon kujdes të menjëhershëm.
Çfarë është presioni në sy?
Presioni në sy përshkruhet si një ndjesi tensioni ose tendosjeje brenda syrit, e cila mund të vijë e shoqëruar me dhimbje, turbullim të shikimit apo ndjeshmëri të lartë ndaj dritës.
Shkaqet e mundshme të presionit në sy
Sipas ekspertëve, disa prej shkaqeve kryesore që lidhen me këtë shqetësim janë:
Infeksionet e sinuseve
Infeksionet bakteriale në zonën e sinuseve – pas hundës, syve dhe mollëzave – janë ndër shkaktarët më të zakonshëm të presionit në sy. Ato shoqërohen me dhimbje të fytyrës, hundë të bllokuara, sekrecione, kollë, dhimbje të kokës e veshëve, temperaturë dhe plogështi.
Dhimbjet e kokës
Shpeshherë dhimbjet e forta të kokës sjellin ndjesinë e presionit në sy, për shkak të pezmatimit të muskujve të qafës dhe shpatullave. Këto dhimbje mund të shoqërohen me skuqje të syve, enjtje të fytyrës dhe rënie të qepallave.
Sëmundjet autoimunitare
Disa sëmundje autoimunitare mund të shkaktojnë inflamacion në zonën pas syrit, duke dëmtuar nervin optik që transmeton sinjalet vizive nga syri tek truri. Simptomat përfshijnë dhimbje të syrit, humbje të shikimit, vështirësi në dallimin e ngjyrave dhe dhimbje të dhëmbëve.
Problemet dentare
Infeksionet ose tensioni në dhëmbë dhe nofull mund të përhapet në muskujt e fytyrës, duke sjellë si pasojë dhimbje koke dhe ndjesi të fortë presioni në sy.
Kur duhet të shkoni te mjeku?
Konsultohuni menjëherë me një mjek nëse përjetoni:
Temperaturë të lartë
Turbullim apo rënie të shikimit
Dhimbje të forta të kokës
Humbje të ndjeshmërisë në pjesë të trupit
Këto simptoma mund të tregojnë një gjendje serioze që kërkon ndërhyrje mjekësore të menjëhershme.
Si ta lehtësoni presionin në sy në kushte shtëpie?
Ekspertët rekomandojnë masa të thjeshta që mund të ndihmojnë në uljen e presionit të syve:
Ushqehuni shëndetshëm, duke përfshirë ushqime të pasura me vitaminat C, E dhe A, si dhe minerale si bakër, zink dhe selenium.
Kufizoni kafeinën, pasi sasitë e mëdha ndikojnë në rritjen e presionit intraokular.
Konsumoni shumë lëngje, për të ruajtur hidratimin dhe balancën e lëngjeve në trup.
Flini me kokën pak të ngritur, që ndihmon në uljen e presionit gjatë natës.
Përdorni me kujdes medikamentet për sy, duke respektuar dozën e rekomanduar. Shpërdorimi i tyre mund të dëmtojë nervin optik.
Sinjali – aty ku e vërteta flet para lajmit!
/GazetaSinjali/
The post Tensioni në sy: Çfarë e shkakton dhe si trajtohet? appeared first on Sinjali.