Zvicra po ofron mbështetje konkrete për përmirësimin e sistemit të urgjencave në Shqipëri, duke trajnuar 160 mjekë dhe infermierë nga 16 bashki të ndryshme të vendit.
Ky angazhim vjen përmes Fondacionit Zviceran për Inovacion / Emergency Response Albania – ERA, i cili po sjell kapacitete dhe protokolle të avancuara për reagimin ndaj emergjencave mjekësore.
Trajnimet janë të fokusuara kryesisht tek mjekët e familjes dhe infermierët, që shpesh janë kontakti i parë me qytetarët në nevojë për ndihmë shëndetësore emergjente.
“Është thelbësore që njerëzit të marrin ndihmë dhe përgjigje ndaj urgjencave sa më shpejt të jetë e mundur dhe sa më afër vendit ku është e nevojshme”, ka deklaruar ambasadorja zvicerane në Shqipëri, Ruth Huber.
Mbështetja e Zvicrës për sistemin shëndetësor shqiptar synon të forcojë reagimin e shpejtë në situata emergjente dhe të rrisë sigurinë e pacientëve në nivel kombëtar.