Kryesuesi i Shoqatës së Mullistëve, Bashkim Zejnullahu, ka hedhur poshtë pretendimet se Kosova mund të preket me mungesë të grurit e miellit si shkak i pushtimit të Ukrainës nga Rusia.
Ai tha se Kosova gjithmonë ka përmbushur nevojat e veta 50 deri në 60 për qind edhe se importet nga Rusia dhe Ukraina nuk kanë qenë kurrë cak, njofton Klankosova.tv.
“Kosova gjithmonë ka plotësuar nevojat e veta të brendshme 50 deri në 60 për qind kurse pjesa tjetër është plotësuar nga importi regjional duke mos e pasur kurrë tregun e Ukrainës apo Rusisë së cak të vetin për importe. Në regjionin tonë duke marrë parasysh Maqedoninë e Veriut, Serbinë dhe Bullgarinë dhe nga Kroacia janë siguruar gjithmonë mangësitë që kanë qenë të nevojshme për tregun e brendshme”, u shpreh ai.
Zejnullahu, në një konferencë të përbashkët me ministren e Tregtisë, Rozeta Hajdari, tha se s’ka nevojë për shqetësime pasi Kosova ka mjaftueshëm grurë dhe miell.