Në orët e hershme të mëngjesit është përfshirë nga zjarri një servis automjetesh në fshatin Katundi i Ri në Pejë, ku janë djegur një kamion, një autobus dhe tri vetura.
Zëdhënësi i Policisë së Kosovës për rajonin e Pejës, Fadil Gashi, për Sinjalin ka bërë të ditur se zjarri është vërejtur gjatë patrullimit policor rreth orës 03:54 dhe njësitet kanë intervenuar menjëherë.
Sipas tij, nuk raportohet për persona të lënduar, ndërsa dëmet materiale janë të konsiderueshme. Shkaku i zjarrit ende nuk dihet dhe është nën hetim.