Presidentja dhe kryeministri i vendit, Vjosa Osmani e Albin Kurti, janë shprehur të shqetësuar me sulmin e sotëm ndaj kryeministres daneze, Mette Frederiksen.
Osmani tha se sulmin ndaj Frederiksen e dënon ashpër, teksa tha se dhuna kundër çdo lideri, është sulm ndaj demokracisë.
“Sulmi i mbrëmjes së sotme ndaj kryeministres daneze Mette Frederiksen në Kopenhagë është i tmerrshëm. E dënoj ashpër. Dhuna kundër çdo lideri është një sulm ndaj vetë shpirtit të demokracisë. Qendro e fortë, e dashur Mette”, shkroi Osmani.
E Kurti tha se kjo ngjarje shqetësuese vjen mes dhunës dhe tensionit në rritje përpara zgjedhjeve të Bashkimit Evropian.
“Figurat politike, veçanërisht gratë, përballen me kërcënime dhe rreziqe alarmante në rolet e tyre publike, duke theksuar kërcënimin e rëndë ndaj demokracisë që përfaqësojnë sulme të tilla. I urojmë kryeminsitres Frederiksen shërim të shpejtë dhe të plotë gjatë kësaj kohe sfiduese”, shkroi Kurti.