Nëse dëshironi të pini më shumë ujë, po bëni një hap drejt shëndetit më të mirë. Sarah Krieger, dietologe e regjistruar nga St. Petersburgu, Florida, për Everyday Health shpjegon se çdo qelizë në trupin tonë mbështetet te uji, i cili është i domosdoshëm për funksionimin e duhur të sistemit tretës, zemrës, mushkërive dhe trurit.
Ekzistojnë udhëzime të ndryshme për sasinë e ujit që duhet pirë. Krieger këshillon klientët e saj të marrin peshën e tyre trupore në paund (një paund është rreth 0.4 kg), ta ndajnë përgjysmë dhe të pinë atë numër në unça (një unç është rreth 30 ml) lëngje në ditë.
Për shembull, nëse peshoni 140 paund (rreth 63 kg), synoni të pini 70 unça lëngje (rreth nëntë gota ose dy litra). Megjithatë, nevojat individuale ndryshojnë në varësi të faktorëve si niveli i aktivitetit, klima, shtatzënia apo sëmundja, që mund të kërkojnë më shumë hidratim.
Rekomandimet e Akademisë Kombëtare të Shkencave, Inxhinierisë dhe Mjekësisë në SHBA sugjerojnë të paktën 13 gota lëngje për burrat dhe nëntë gota ose më shumë për gratë.
Ja shtatë momente të rëndësishme gjatë ditës kur duhet të pini ujë:
Kur zgjoheni
Filloni mëngjesin me 1-2 gota ujë. Gjatë gjumit nuk hidratohemi, prandaj kur zgjoheni mund të jeni lehtësisht të dehidratuar. Ky zakon gjithashtu ndihmon nëse merrni ilaçe në mëngjes.
Para vakteve
Pija e një gote ujë para vakteve mund të ndihmojë në rregullimin e urisë dhe të parandalojë mbingopjen. Studimet tregojnë se pirja e ujit para një vakti mund të zvogëlojë konsumimin e ushqimit dhe të rrisë ndjenjën e ngopjes.
Gjatë vakteve
Pirja e ujit gjatë vakteve ndihmon tretjen, sidomos kur konsumoni ushqime të pasura me fibra, pasi ndihmon fibrat të kalojnë më lehtë përmes sistemit tretës.
Kur ndiheni të lodhur pasdite
Në vend që të pini kafe apo të konsumoni diçka të ëmbël, provoni të pini ujë. Dehidratimi mund të shkaktojë lodhje dhe ndryshime në humor, kështu që hidratimi mund të ndihmojë në ruajtjen e energjisë dhe përqendrimit.
Kur keni dhimbje koke
Dehidratimi është një shkaktar i njohur i dhimbjeve të kokës dhe migrenës. Rritja e konsumit të ujit mund të zvogëlojë intensitetin dhe frekuencën e këtyre simptomave.
Para, gjatë dhe pas ushtrimeve fizike
Hidratohuni mirë para se të bëni ushtrime fizike dhe vazhdoni të pini ujë për të shmangur dehidratimin. Pirja e vazhdueshme e ujit ditët para një stërvitjeje të rëndësishme është thelbësore, sidomos për ngjarje që kërkojnë qëndrueshmëri.
Para gjumit
Edhe pse nuk është e këshillueshme të pini sasi të mëdha ujë para gjumit, një gllënjkë ose mbajtja e një gote pranë shtratit mund të ndihmojë nëse zgjoheni të etur gjatë natës.
Këshilla
Ja disa këshilla që të pini më shpesh ujë:
- Mbani llogari sa shishe ujë duhet të pini çdo ditë, gjë që është më e thjeshtë se sa të numëroni gotat individuale.
- Bëjeni ujin më tërheqës duke rregulluar temperaturën (më të freskët ose më të ngrohtë) ose duke shtuar feta frutash për aromë.
- Mbani ujë pranë shtratit si një kujtesë vizuale për të qëndruar të hidratuar.
- Merrni pjesë në një sfidë për hidratim ose përdorni aplikacione për të ndjekur konsumin e ujit dhe për të krijuar një zakon të qëndrueshëm të hidratimit të rregullt.