Pas një fushate intensive dhe angazhimi të vazhdueshëm, Sala Jashari është radhitur ndër më të votuarit në Partinë Demokratike të Kosovës (PDK). Ajo ka zhvilluar një takim me kryetarin e partisë, Memli Krasniqi, ku është diskutuar për punën dhe objektivat afatgjata të saj në politikë.
Përmes një postimi, Jashari ka falënderuar Kryetarin Krasniqi dhe Kryetarin e Degës së Skenderajt, Sami Lushtakun, për mbështetjen dhe hapësirën e krijuar për të rinjtë në parti.
“Njëkohësisht dua ta falënderoj Kryetarin z. Krasniqi dhe Kryetarin e Degës së Skenderajt, z. Sami Lushtaku, që më mundësuan të bëhem një shembull për të rinjtë e Kosovës, duke dëshmuar se secili prej nesh ka mundësinë të kontribuojë,” ka shkruar ajo.
Ajo ka vlerësuar përkushtimin e strukturave të PDK-së dhe aktivistëve, të cilët, sipas saj, gjithmonë dalin jashtë pritshmërive kur bëhet fjalë për Kosovën.
“Dhe të dashur votues, me besimin tuaj, puna jonë është e pandalshme. Gjithmonë besnike ndaj të gjithë ju mbështetësve të mi,” ka përfunduar Jashari.
Angazhimi i saj dhe rezultati i arritur tregojnë për një mbështetje të fortë brenda partisë dhe përkushtimin e saj për të vazhduar punën politike.