Kryeministri i Kosovës, Albin Kurti, s’do të donte t’i ndodhte kurr një gjë e tillë, megjithatë kreu i Qeverisë dhe lideri i LVV-së ka rënë pre e rrengut të dy komedianëve të famshëm rusë, Vladrimir Kuznetsov dhe Alexei Stolyraov.
Dy komedianët rusë i janë lajmëruar Kurtit duke iu paraqitur si presidenti i Letonisë, Edgar Rinkevics, duke folur për zgjedhjet në Kosovë, për dialogun me Serbinë, emisarin amerikan, Richard Grenell, e çështje të tjera.
Në videon që kanë publikuar në llogarinë e tyre në “X”, biseda fillon me një urim për fitoren e Kurtit në zgjedhje, derisa kryeministri dëgjohet duke u ankuar për “luftë hibride” kundër Qeverisë, përmend dhe partitë opozitare dhe për oligarkët, duke e veçuar njërin që ka në pronësi një televizion.
Në këtë video, që pretendohet të jetë autentike, Kurti flet edhe për emisarin amerikan, Richard Grenell, orientimin e tij seksual dhe dëgjohet duke thënë se Grenell e ka rrëzuar qeverinë e parë dhe se tashmë ai po bashkëpunon me opozitën.