Sukses i madh për grupmoshën U19 të KF Drenica, që nën drejtimin e trajnerëve Lulzim Derguti dhe Bekim Xani, janë shpallur kampionë të Ligës së Parë të Juniorëve dhe kanë siguruar inkuadrimin në Superligë.
Juniorët kuqezi treguan dominim të plotë gjatë sezonit, duke e përmbyllur kampionatin pa asnjë humbje. Nga 14 ndeshje të zhvilluara, ata fituan 12 herë dhe barazuan në dy raste, me një goldallim mbresëlënës – 45 gola të shënuar dhe vetëm 9 të pranuar.
Kupa dhe medaljet për kampionët iu dorëzuan nga përfaqësuesit e FFK-së, Ardian Llumnica, kryetar i Komisionit të Garave për Ligën e Juniorëve, si dhe Bardhec Seferi, kryetar i Ligës Rajonale të Futbollit për Mitrovicë.
Ky sukses është rezultat i punës së përkushtuar të stafit teknik, mbështetjes nga drejtuesit e klubit, si dhe angazhimit të vetë futbollistëve, të cilët po dëshmojnë talent të jashtëzakonshëm. KF Drenica vazhdon të jetë shembull për zhvillimin e ekipeve zingjirore, me shumë lojtarë që tashmë janë pjesë edhe e skuadrës së parë.