hërbimi meteorologjik izraelit ka paralajmëruar se kushtet e rënda atmosferike që kanë përfshirë pjesën më të madhe të vendit mund të vazhdojnë, ndërsa zjarret përfshijnë Jerusalemin dhe Izraelin qendror.
Kombinimi i erërave të forta, temperaturave jashtëzakonisht të larta dhe lagështisë së ulët në vend po rrit rrezikun dhe përhapjen e zjarreve.
Sipas Jerusalem Post, një burrë 50-vjeçar është arrestuar nën dyshimin se ka tentuar të ndezë një fushë të hapur në jug të Jerusalemit.
Ministri i Jashtëm i Izraelit, Gideon Sa’ar, po zhvillon një “maratonë” bisedimesh me homologët ndërkombëtarë, me fokus në vendet evropiane.
Për shuarjen e zjarreve janë angazhuar 119 ekipe zjarrfikësish, 10 avionë zjarrfikës dhe një helikopter. Mediat izraelite kanë raportuar se kryeministri i vendit, Benjamin Netanyahu, është nisur drejt zonës së përfshirë nga zjarret.
Komandanti i shërbimit të zjarrfikësve dhe shpëtimit në rajonin e Jerusalemit ka deklaruar se këto mund të jenë zjarret më të mëdha në historinë e Izraelit dhe se zjarrfikësit kanë ende shumë punë përpara se të mund ta vendosin zjarrin nën kontroll.
“Ne jemi në mes të një zjarri shumë të madh, ndoshta më të madhit që ka ndodhur ndonjëherë në këtë vend”, tha Shmulik Friedman gjatë një konference për shtyp të mbajtur sonte. Ai shtoi gjithashtu se janë ende shumë larg kontrollit të kësaj situate.
Ndihma ndërkombëtare nga bashkësia globale, përfshirë vendet fqinje Greqinë, Kroacinë, Italinë, Qipron dhe Bullgarinë, nuk pritet të mbërrijë deri të enjten në mëngjes.