Gjykata Speciale është shashtrisur nga raporti i avokatëve britanikë të “The Bar Human Rights Committee of England and Wales” – të cilët kanë ngritur shqetësime serioze për shkelje të të drejtave të akuzuarve – krerëve të Ushtrisë Çlirimtare të Kosovës dhe të tjerëve.
Kundër tij, Specialja është aktivizuar me një fushatë prapa perdeve – por edhe publikisht.
VOX Kosova ka parë një e-mail zyrtar që Dhomat e Specializuara të Kosovës i kanë dërguar ambasadave të vendeve të Bashkimit Evropian të akredituara në Hagë.
Në këtë email, flitet kryesisht për raportin e BHRC-së, ku Specialja thotë se “ai nuk pasqyron në mënyrë të barabartë zhvillimet” në proceset gjyqësore atje.
Edhe në këtë email, Gjykata e sulmon Avokatin e Popullit si iniciues të këtij raporti.
Sipas asaj që ka parë VOX Kosova, thuhet se vlerësimet e tij për raportin nuk pasqyrojnë saktë përmbajtjen dhe kështu paraqitet një pamje e gabuar për Dhomat e Specializuara.
Ajo që vërehet në email është se Specialja ka komunikim dhe raportim të vazhdueshëm me ambasadat e Bashkimit Evropian, pasi që qysh në fillim theksohet “fryma e informimit të vazhdueshëm për zhvillimet në Gjykatë”.
Kjo gjë ngre pikëpyetje të mëdha për qasjen e Bashkimit Evropian ndaj procesit, i cili përcillet me shumë shqetësime për shkelje të të drejtave të akuzuarve.
Mbetet dilemë nëse ky informim i vazhdueshëm është i pasqyruar në mënyrë të barabartë – apo vetëm nga njëra palë, duke lënë jashtë zërin e mbrojtjes.
Në email, Gjykata tregohet aq e gatshme për të folur për raportin sa u ofron ambasadave mundësinë që të bisedojnë kurdo.
Avokatët britanikë kanë përpiluar një raport 90-faqesh, të publikuar ditë më parë nga Avokati i Popullit i Kosovës.
Në të konstatohet se paraburgimi i gjatë dhe procesi në tërësi, pabarazia e armëve, pyetjet e gjyqtarëve në mënyrë sugjestive, mosfiltrimi i provave nga Serbia, procesi i mbyllur, janë disa nga shqetësimet serioze për shkelje të të drejtave të njeriut.
Raporti i detajuar u është dërguar nga Avokati i Popullit i Kosovës edhe institucioneve të Bashkimit Evropian si dhe SHBA-ve.
Gjykata Speciale kishte reaguar përmes një komunikate duke e thënë se raporti është shtrembëruar nga Avokati i Popullit i Kosovës.
Komiteti për të Drejtat e Njeriut i Odës së Avokatëve të Anglisë dhe Uellsit (BHRC) kishte lëshuar një komunikatë sqaruese për raportin e tyre për shkeljet në Gjykatën Speciale. Komiteti sqaronte se raporti është përgatitur “pa ndërhyrje apo input nga institucioni inicues”.
Për më tepër, BHRC ka sqaruar edhe metodologjinë e punës që ka përdorur në hartimin e tij – e bazuar në praktika shkencore.