Protesta “Jo në emrin tim” do të vazhdojë edhe sonte në sheshin “Skënderbeu” në Prishtinë, ku do të mbahet nata e 13-të e tubimit.
Protesta nis në orën 21:00, ndërsa gjatë mbrëmjes janë paraparë disa aktivitete dhe fjalime.
Programi do të hapet me Betimin e Ushtarit, të cilin do ta bëjë veterani Bekim Juniku. Ai më pas do të ndajë edhe dëshminë e tij personale.
Të pranishmëve do t’u drejtohen organizatori i protestës, Çlirim Haziri, gazetarja nga Shqipëria, Denada Kola, si dhe aktori Kushtrim Sheremeti.
Në ekranin LED do të shfaqet videoja “Rrëfimi i ushtarit”, ndërsa Luan Jahiri do të interpretojë një pjesë kushtuar Epopesë së Jezercit dhe një këngë ushtarake.
Në fund të programit është paralajmëruar edhe aksioni simbolik “Një minutë heshtje për drejtësinë”.