Ministrat e Jashtëm të BE-së kanë diskutuar për dialogun Kosovë-Serbi në një takim sot në Bruksel, duke arritur në përfundimin se është e nevojshme të krijohet një “atmosferë më e mirë” në bisedime, ka thënë ministri i Jashtëm i BE-së, Josep Borrell.
Ai ka thënë se shpreson se para verës do të mund të mbahet një takim tjetër në nivelin më të lartë politik në mes të kryeministrit të Kosovës Albin Kurti dhe presidentit të Serbisë Aleksandar Vuçiq.
“Ne kemi nevojë për angazhim konstruktiv dhe progres të shpejtë drejt normalizimit të marrëdhënieve ndërmjet Kosovës dhe Serbisë. Të gjithë janë dakord për këtë, por kur ulen bashkë, e kanë problem të përparojnë. Duhet të ndërtojmë besim”, tha Borrell.
“Shpresoj se para verës do të mund të mbajmë një takim tjetër në nivelin më të lartë politik në mes të kryeministrit të Kosovës dhe presidentit të Serbisë”, ka shtuar ai.