Federata e Futbollit të Kosovës ka reaguar sot nëpërmjet një shkrimi për sulmin ndaj trajnerit, Faruk Statovci.
“Federata e Futbollit e Kosovës me shqetësim ka mësuar lajmin se mbrëmjen e kaluar persona të panjohur e kanë sulmuar fizikisht ish-futbollistin e njohur dhe trajnerin e Kombëtares U15, Faruk Statovci, në afërsi të banesës së tij në Prishtinë, pas pjesëmarrjes në një emision televiziv“, shkruan FFK.
FFK ka dënuar ashpër dhunën e ushtruar ndaj trajnerit Statovci, i cili tash e sa kohë me përvojën dhe intelektin e tij kontribuon edhe në cilësi të analistit në disa emisione sportive në televizionet vendore.
“Një ngjarje e tillë e rëndë e ka goditur jo vetëm familjen Statovci, por edhe komunitetin e futbollit në tërësi“.
Prandaj, FFK u bën thirrje autoriteteve ligjzbatuese që të punojnë në mënyrë intensive për hetimin dhe zbardhjen e këtij rasti, në mënyrë që personat që e kanë bërë këtë akt çnjerëzor të vihen sa më parë para drejtësisë.
“Shpresojmë se ngjarje si kjo të mos ndodhin asnjëherë, pasi ato cenojnë lirinë e shprehjes por edhe imazhin e futbollit“, është shprehur FFK.
Njëherësh FFK dhe i gjithë komuniteti i futbollit i dëshiron Faruk Statovcit shërim të shpejtë dhe rikthim në punën e tij të përditshme si trajner i grupmoshave të reja. /Telenews.al/