Një valë e re arrestimesh ka goditur botën e showbiz-it turk. Në kuadër të një operacioni të gjerë të koduar kundër lëndëve të ndaluara, autoritetet kanë shoqëruar në polici 22 persona në orët e para të mëngjesit. Mes emrave më të përfolur që janë vënë në pranga përfshihen aktorja e njohur Beren Saat, bashkëshorti i saj, këngëtari Kenan Doğulu, aranzhuesi Ozan Doğulu, si dhe aktori Enis Arıkan.
Shtrirja e këtij hetimi nuk ndalet me aq. Zyra e Luftës Kundër Lëndëve Narkotike pranë Drejtorisë së Policisë së Stambollit ka lëshuar urdhër-arreste edhe për figura të tjera publike mjaft të ndjekura. Këngëtarja Ayşe Hatun Önal, personazhi i rrjeteve sociale Kerimcan Durmaz dhe këngëtari Berdan Mardini janë gjithashtu pjesë e listës së personave ndaj të cilëve është urdhëruar ndalimi. Pas kontrolleve të rregullta mjekësore, të famshmit janë dërguar në qendrën e Drejtorisë Narkotike në rrethin Küçükçekmece për t’u marrë në pyetje.
Ky nuk është aksioni i parë i këtij lloji që trondit skenën publike turke së fundmi. Më 21 maj, një tjetër operacion i ngjashëm vuri në shënjestër personazhe si këngëtari Mabel Matiz dhe aktorja e famshme Serenay Sarıkaya, të cilëve iu morën mostra të gjakut, flokëve dhe urinës për analiza toksikologjike. Legjislacioni turk parashikon dënime të ashpra dhe të ndara për konsumimin, nxitjen dhe tregtinë e lëndëve narkotike, ku vetë akti i përdorimit personal specifikohet si blerje, pranim apo mbajtje e këtyre substancave.
Megjithatë, këto aksione të bujshme kanë ngritur një debat të madh mbi të drejtat e njeriut dhe imazhin publik. Shumë prej emrave të njohur që kanë kaluar nëpër procese të tilla hetimore argumentojnë se u është dëmtuar rëndë reputacioni dhe se është shkelur parimi i prezumimit të pafajësisë përpara opinionit publik. Ata kujtojnë gjithashtu se në mjaft raste të ngjashme në të kaluarën, testet e drogës për personazhet VIP kanë rezultuar krejtësisht negative./Prive