Një tërmet i fuqishëm, me magnitudë 7.8 goditi të hënën pjesë të gjera të Turqisë dhe Sirisë fqinje, duke vrarë të paktën tremijë njerëz dhe duke plagosur mijëra të tjerë.
Lëkundjet e forta rrëzuan qindra ndërtesa dhe bllokuan banorët nën grumbuj rrënojash, shkruan Euronews.
Autoritetet kanë frikë se numri i të vdekurve do të rritet më tej, ndërsa shpëtimtarët po kërkojnë për të mbijetuar nëpër rrënojat prej metali dhe betoni.
Banorët e trembur nga tërmeti para agimit dolën jashtë në shi dhe borë për të shpëtuar nga copat prej betoni që binin, ndërsa ata që ishin bllokuar bërtitën për ndihmë.
Pasgoditjet e mëdha, duke përfshirë një tërmet pothuajse aq të fortë sa tërmeti fillestar, vazhduan të tronditin rajonin.
“Unë nuk kam më forcë,” u dëgjua një i mbijetuar duke thirrur nga poshtë rrënojave në qytetin turk të Adanas, ndërsa punonjësit e shpëtimit u përpoqën ta arrinin atë, tha një banor, student i gazetarisë Muhammet Fatih Yavuz.
Ai tha se tre ndërtesa pranë shtëpisë së tij u rrëzuan.