Në një supermarket “Rewe” në lagjen Marienfelde të Berlinit, një burrë mbajti peng një grua nga mbrëmja e së premtes deri në mëngjesin e së shtunës. Motivi i ngjarjes mbetet ende i panjohur.
Pas një situate të tensionuar që zgjati me orë të tëra, situata me pengje në një supermarket në Berlinin jugor ka përfunduar. “I dyshuari është neutralizuar dhe pengu është liruar,” deklaroi të shtunën në mëngjes zëdhënësi i policisë, Florian Nath. Personi që mbante pengun pësoi lëndime të lehta gjatë arrestimit, shkruan bluewin.ch.
Sipas raporteve të policisë, oficerët e operacioneve speciale e neutralizuan të dyshuarin dhe liruan gruan që mbahej peng rreth orës 09:20. Raportohet se gjatë operacionit është përdorur një pajisje “Taser”.
Sa i përket gjendjes së gruas, zëdhënësi i policisë fillimisht mundi të raportonte vetëm se ajo ishte në gjendje shoku dhe ishte dërguar në spital. Në atë moment, Nath nuk ishte në gjendje të jepte detaje të mëtejshme mbi gjendjen e saj. “Për fat të mirë, askush këtu nuk u lëndua rëndë. Me sa dimë deri më tani, nuk ka lëndime serioze për të raportuar.”