Prokuroria Speciale ka ngritur aktakuzë në mungesë kundër tre serbëve me inicialet L.Č., P.B dhe M.I, nën dyshimet për krime lufte në Burgun e Prishtinës dhe në Lipjan.
Sipas njoftimit të Prokurorisë Speciale, njëri prej të akuzuarve në kohën e luftës ka qenë drejtor në Burgun e Qarkut në Prishtinë ndërsa dy të tjerët thuhet se kanë qenë gardianë në këtë burg.
Prokuroria Speciale njofton se “i pandehuri L.Č., në cilësi të personit zyrtar-drejtor i burgut të Qarkut në Prishtinë, gjatë periudhës së konfliktit të armatosur, përkatësisht luftës në Kosovë 1998-1999, në Burgun e Prishtinës dhe në paralelen në Lipjan, në bashkëkryerje edhe me zyrtarë të tjerë të këtyre burgjeve, në bashkëkryerje ka kryer veprën penale ‘’Krime Lufte Kundër Popullatës Civile”.
Ndërkaq të pandehurit P.B dhe M.I., në cilësinë e personave zyrtarë-gardianë të Burgut të Prishtinës dhe paraleles në Lipjan, gjatë periudhës së konfliktit të armatosur, përkatësisht luftës në Kosovë 1998-1999, në Burgun e Prishtinës dhe në paralelen në Lipjan, në bashkëkryerje edhe me zyrtarë tjerë të këtyre burgjeve, në bashkëkryerje kanë kryer veprën penale ‘’Krime Lufte Kundër Popullatës Civile’’.