Vlerësimi i performancës së anëtarëve të Këshillit Gjyqësor dhe Këshillit Prokurorial të Kosovës nuk mund të bëhet nga Komisioni për Vlerësimin e Performancës. Kështu u tha në konferencën e organizuar nga Instituti i Kosovës për Drejtësi (IKD).
Drejtori ekzekutiv i IKD-së, Ehat Miftaraj, ka thënë se Ministria e Drejtësisë fatkeqësisht nuk po vepron në mënyrë ligjore për t’i përmbushur kërkesat për një proces transparent.
“Fatkeqësisht në vitet e fundit kemi parë që Ministria e Drejtësisë nuk ka vlerësuar as nuk i ka përmbushur kërkesat që të kemi një proces transparent. Po flasim për politikat e drejtësisë, këto politika që kanë për bazë drejtësinë në përfshirje të Këshillit Gjyqësor dhe ai Prokurorial. Kjo e ulë besimin e publikut”, u shpreh Miftaraj.
Hulumtuesi i IKD-së, Melos Kolshi, ka thënë se anëtarët e këshillave, të cilët janë të mandatuar që ta bëjnë vlerësimin e performancës së gjyqtarëve dhe prokurorëve nuk mund të jenë subjekt i vlerësimit të performancës në kapacitetin e tyre si anëtarë të Këshillave.