Tetë institucione shëndetësore private janë mbyllur këtë javë nga Inspektorati Shëndetësor, pasi janë kapur duke operuar pa licencë.
Lajmin e ka bërë të ditur ministri në detyrë i Shëndetësisë, Arben Vitia, përmes një postimi në rrjetin social Facebook.
Sipas tij, aksioni është pjesë e inspektimeve të rregullta që kanë për qëllim garantimin e respektimit të ligjit dhe standardeve të shërbimeve shëndetësore në sektorin privat.
“Shëndeti i qytetarëve nuk mund dhe nuk do të lejohet që të rrezikohet nga veprimtari të paligjshme,” ka shkruar Vitia, duke u bërë thirrje të gjitha institucioneve shëndetësore që të veprojnë në përputhje me ligjin dhe rregulloret në fuqi.
Vitia, ka falënderuar Inspektoratin Shëndetësor dhe inspektorët për angazhimin dhe punën e përditshme në terren.
Inspektorati Shëndetësor, si pjesë e Ministrisë së Shëndetësisë, ka intensifikuar kontrollet në institucionet private në të gjithë vendin, me qëllim të rritjes së sigurisë dhe cilësisë së kujdesit shëndetësor./IndeksOnline/