Peshkopët e Kishës Ortodokse Serbe, në krye me patriarkun serb Profirije, përmes një njoftimi për media, janë shprehur të bindur se Serbia nuk dëshiron dhe rrjedhimisht nuk do të pajtohet me asnjë marrëveshje ku kërkohet njohja e pavarësisë së Kosovës.
Reagimi i tyre ka ardhur në ditën kur Kosovën dhe Serbinë po vizitojnë top-diplomatët evropiano-amerikane të udhëhequr nga i deleguari i Bashkimit Evropian për dialogun Kosovë-Serbi, Miroslav Lajçak.
“Udhëheqësi shpirtërori i serbëve ortodoksë edhe një herë ka përsëritur qëndrimin tashmë të njohur të Kishës Ortdokse Serbe se Kosova është pjesë përbërëse dhe patjetërsueshme e Serbisë dhe se ruajtja e saj brenda kufijve të Serbisë është detyrim dhe imperativ kushtetues si për Kishën ashtu edhe për shtetin”, thuhet në njoftimin, raporton mediumi serb Nova.rs.
Në njoftim ndër të tjera thuhet se Kisha Ortodokse Serbe do të mbështesë gjithmonë udhëheqjen e Serbisë në përpjekjet e saj “për ruajtjen e Kosovës” si pjesë të Serbisë.
Sipas Novostit, gazetës së afërt me pushtetin në Serbi, presidenti i Serbisë, Aleksandër Vuçiç në takim me pesëshen diplomatike, do të përballet me një ultimatum të drejtpërdrejtë nga këta të fundit në raport me statusin e Kosovës.
Gazeta në fjalë, pa cituar burimet, ka kuptuar se Lajçak i shoqëruar edhe me këshilltarët për polikë të jashtëm të Gjermanisë, Francës, Italisë në njërën anë dhe me zëvendës-ndihmës sekretarin e Shteteve të Bashkuara për Çështje Evropiane dhe Euroaziatike, Gabriel Escobar, në anën tjetër, do të parashtrojë një kërkesë konkrete Vuçiç’it.
Nga ai do të kërkohet të pranohet propozimi franko-gjerman ose në të kundërtën Serbia do të përballet me sanksione ose masa nga më të rëndat.
Ndryshe Lajçak, gjatë ditës është takuar me kryeministrin e Kosovës, Albin Kurti, pikërisht për të diskutuar për planin franko-gjerman, të cilën Albanian Post e kishte publikuar pjesërisht më 18 shtator dhe tërësisht më 12 nëntor.
Takimi mes diplomatit sllovak dhe të parit të qeverisë ka zgjatur rreth dy orë.
Për Lajçak, takimi me Kurtin ishte i gjatë e i vështirë, por edhe i hapur dhe i sinqertë.
Megjithatë ai shprehu drojën e tij se Albin Kurti nuk e ka kuptuar akoma çfarë mundësie të madhe paraqet propozimi franko-gjerman.
Kjo të paktën ishte përshtypja me të cilën ka dalur nga takimi përfaqësuesi special i Bashkimit Evropian, Miroslav Lajçak.
“Është shumë herët për të bërë ndonjë deklaratë dramatike, sepse jemi në mes të negociatave dhe kemi një takim në Beograd dhe s’mund të them shumë, por në këtë pikë kemi pritur kuptueshmëri më të madhe të kësaj mundësie që vjen me ofertë tonën”, tha Lajçak shkurtimisht para gazetarëve që ishin mbledhur pranë objektit të Qeverisë.