Liderët evropianë u mblodhën së fundmi për të diskutuar marrëveshjen e mundshme të paqes mes Ukrainës dhe Rusisë, në kuadër të një samiti të Bashkimit Evropian dhe Bashkimit Afrikan, që po zhvillohej në Angola.
Kryeministri polak, Donald Tusk, theksoi se asnjë marrëveshje që përfshin Ukrainën nuk mund të dëmtojë sigurinë e Polonisë dhe Evropës. Ai e shprehu këtë në një konferencë për shtyp, sipas agjencisë Reuters.
Ndërkaq, Kancelari gjerman, Friedrich Merz, theksoi se Evropa duhet të vazhdojë të mbrojë interesat e Ukrainës dhe të sigurojë që ky vend të ketë një ushtri të fortë dhe garanci të qëndrueshme sigurie. Ai shtoi se mbështetje të tillë ka shumë rëndësi për të siguruar një të ardhme të sigurt për Ukrainën.
Presidenti i Këshillit Evropian, António Costa, theksoi se çështjet të tilla si sanksionet, zgjerimi i BE-së dhe ngrirja e aseteve duhet të merren me miratimin dhe përfshirjen e të gjitha shteteve anëtare të Bashkimit Evropian.Ndërsa presidentja e Komisionit Evropian, Ursula von der Leyen, u shpreh se, megjithëse ende ka punë për t’u bërë në lidhje me marrëveshjen e paqes, tani ekziston një “bazë solide për të vazhduar përpara”. Ajo theksoi gjithashtu se, si shtet sovran, Ukraina ka të drejtën të vendosë për forcat e saj të armatosura dhe se “zgjedhja e fatit të saj është në duar të saj.”