Edona Maloku-Bërdyna, zëvendësministrja e Arsimit, Shkencës, Teknologjisë dhe Inovacionit (MASHTI), ka thënë se nuk dihet nëse mësimdhënësit do ta marrin pagën e shtatorit.
Kjo pasi i gjithë shtatori ka qenë grevë.
Ajo ka thënë në KTV se ka informacione që listat e grevistëve nuk janë dorëzuar të plota nga komunat.
“Për sa i përket asaj se çka do të ndodhë tani, pritet që vendimi për pagat të merret nesër nga Ministria e Financave. Ne nga terreni kemi informata se listat nuk janë dorëzuar të plota, se nuk janë dorëzuar korrekte nga drejtoritë komunale të arsimit, pra jo plotësisht të azhurnuara. Sigurisht kolegët tanë në proces të verifikimit do të shohin se si qëndron kjo. Nuk ka ndonjë konfirmim se a do t’i marrin pagat e shtatorit”, ka thënë ajo.
Ndërkohë Sindikata e Arsimit është duke i pyetur mësimdhënësit nëse janë që ta pezullojnë grevën deri më 31 dhjetor.
Greva në arsim ka nisur më 25 gusht dhe s’ka pasur marrëveshjeve përkundër takimeve të përfaqësueve të Qeverisë me ata të Sindikatës.