Telenews

Netanyahu urdhëron ushtrinë izraelite për këtë veprim në Gaza

Kryeministri izraelit Benjamin Netanyahu tha të premten se ka urdhëruar ushtrinë të përgatisë një plan për të evakuuar civilët nga qyteti jugor i Rripit të Gazës, Rafah, përpara një sulmi të pritshëm tokësor.

“Është e pamundur të arrihet qëllimi i luftës për eliminimin e Hamasit duke lënë katër njësi ushtarake të Hamasit në Rafah”, tha ai në një deklaratë.

Ai tha se i kishte kërkuar Forcave të Mbrojtjes të Izraelit që të paraqesnin një plan për evakuimin e civilëve dhe shkatërrimin e batalioneve.

Deklarata nuk përcaktonte një afat kohor për planin apo se ku mendonte ai se mund të evakuoheshin më shumë se 1.4 milionë palestinezë.

Zyrtarët e Kombeve të Bashkuara kanë thënë vazhdimisht se tani nuk ka askund siguri në Gazë.

Zoti Netanyahu tha këtë javë se qytetet Rafah dhe Khan Younis janë “dy bastionet e fundit të Hamasit”. Hamasi është shpallur organizatë terroriste nga Shtetet e Bashkuara.

Qyteti Rafah, në kufi me Egjiptin, është pikë kryesore për hyrjen e ndihmave humanitare. Egjipti ka paralajmëruar se ndërhyrjet tokësore në këtë qytet, ose zhvendosja masive përtej kufirit do të minonte traktatin e paqes me Izraelin, që zbatohet prej 4 dekadash.

Të paktën tetë persona u vranë të premten nga sulmet izraelite në Rafah në Rripin e Gazës, në mesin e të cilëve gra dhe fëmijë.

Paralajmërimi amerikan

Njoftimi i kryeministrit izraelit erdhi disa orë pasi Presidenti i Shteteve të Bashkuara bëri disa nga kritikat më të ashpra ndaj ndërhyrjes ushtarake të Izraelit. “Mendoj se përgjigja në Rripin e Gazës është e tepruar…”, u shpreh zoti Biden.

Pentagoni tha të premten se Sekretari i Mbrojtjes Lloyd Austin bisedoi me homologun e tij izraelit, Yoav Gallant, të enjten. Gjatë bisedës, zoti Austin “përsëriti nevojën për mbrojtjen e civilëve ndërsa Izraeli kryen operacionet kundër Hamasit”. Shtëpia e Bardhë tha të enjten se nuk do të mbështeste asnjë plan të Izraelit për operacione të mëdha ushtarake në Rafah dhe se Sekretari i Shtetit Antony Blinken i kishte bërë të qarta shqetësimet e Shteteve të Bashkuara për operacione të tilla.

“Çdo operacion i madh ushtarak në Rafah tani, në këto rrethana, me më shumë se një milion, ndoshta më shumë se një milion e gjysmë palestinezë që po kërkojnë strehim dhe kanë kërkuar strehim në Rafah, pa marrë parasysh sigurinë e tyre do të ishte një katastrofë dhe ne nuk do ta mbështesim atë”, u tha gazetarëve zëdhënësi i Shtëpisë së Bardhë për Sigurinë Kombëtare, John Kirby

Pavarësisht paralajmërimeve publike ndaj Izraelit, Shtetet e Bashkuara vazhdojnë të mbështesin fort ofensivën ushtarake të Izraelit për të eliminuar Hamasin.

Shtëpia e Bardhë ka deklaruar se beson se ka ende një rrugë drejt një armëpushimi të përkohshëm. Javën e ardhshme, Presidenti Biden pritet të takohet me Mbretin Abdullah të Jordanisë në kuadër të përpjekjeve për armëpushim dhe një marrëveshje për lirimin e pengjeve. Ministria e Shëndetësisë në Gazën e udhëhequr nga Hamasi thotë se sulmi i Izraelit në Gazë ka shkaktuar vdekjen e më shumë se 27 mijë palestinezëve.

Izraeli nisi luftën pas sulmit të 7 tetor nga grupi i Hamasit, që sipas autoriteteve izraelite la të vrarë 1,2000 persona ndërsa 240 të tjerë u morën peng./VOA

Të ngajshme

Publikohet fotoja e arkivolit të hapur të Navalnyt, mijëra njerëz e presin në rrugë

Hafize Elshani

Ekipi i Navalnyt thotë se askush nuk po pranon ta bartë kufomën e tij

Hafize Elshani

Vdes në moshën 84-vjeçare ish-kryeministri i Kanadasë, Brian Mulroney

Hafize Elshani