Problemet mes çifteve shpeshherë nuk marrin fund me ndarje.
Personat e pakënaqur me vendimin për t’i ndarë rrugët, në shumë raste u shkaktojnë telashe partnerëve të tyre, duke i kërcënuar e shantazhuar në forma të ndryshme, raporton Telenews.al.
Për një rast të tillë që ka ndodhur në rrugën “Mbretëresha Teutë” në Prishtinë është futur në telashe me Policinë e Kosovës edhe një shtetas i Shqipërisë.
Sinjali mëson se i dyshuari B.V., e ka kanosur ish bashkëshorten e tij, duke i dërguar mesazhe kërcënuese, për shkak të një fotoje që ia kishte publikuar.
Si rezultat i denoncimit, me urdhër të Prokurorit të Shtetit, ndaj të dyshuarit është iniciuar rasti si “Kanosje”, teksa brenda afatit ligjor pritet të merren veprimet e tjera hetimore.