Policia e Kosovës ka raportuar për dy raste të ndara të lidhura me narkotikë në qytetin e Pejës, që janë trajtuar nga Njësiti i DHTN-Pejë më 30 shtator 2025.
Rasti i parë – Posedim i paautorizuar i narkotikëve
Rreth orës 16:00, pas një hetimi disa mujor dhe me urdhër të prokurorit, është bastisur prona e një të dyshuari mashkull kosovar. Gjatë bastisjes janë gjetur dhe konfiskuar rreth 4.8 gramë substancë e dyshuar narkotike e llojit marihuanë, e ndarë në katër paketime, si dhe një “grinder”.
I dyshuari për këtë rast ndodhej tashmë në vuajtje të dënimit, sipas një urdhër-arresti të lëshuar nga Gjykata Themelore në Pejë.
Rasti i dytë – Kultivim i bimës së kanabisit
Po të njëjtën ditë, rreth orës 10:00, pas marrjes së informatave dhe me urdhër të prokurorit, policia ka bastisur objektin e banimit dhe pronat përcjellëse të një mashkulli kosovar. Gjatë kontrollit është gjetur një bimë e dyshuar si kanabis Sativa, me gjatësi rreth 2 metra.
Në vendin e ngjarjes kanë dalë krim-teknikët, të cilët e kanë evidentuar rastin, ndërsa me urdhër të prokurorit bima është shkatërruar. I dyshuari është arrestuar, por pas intervistimit është liruar në procedurë të rregullt.
Të dy rastet janë duke u hetuar nga njësitet përkatëse të Policisë së Kosovës.