Një vajzë 15-vjeçare nga Prishtina, e cila ishte raportuar si e zhdukur që nga data 19 qershor, është gjetur e sigurt dhe në gjendje të mirë shëndetësore.
Burimet e Sinjalit bëjnë me dije se rasti ishte paraqitur më 20 qershor nga motra e saj, M.B., rreth 21-vjeçare e cila kishte deklaruar se e mitura E.B., rreth 15-vjeçare kishte dalë nga shtëpia në rrugën “Ismet Krasniqi” dhe nuk ishte kthyer më.
Që atëherë, Policia e Kosovës kishte iniciuar rastin “Person i zhdukur”, nën udhëzimet e Prokurorit të Shtetit.
Pas disa ditësh pa asnjë gjurmë, më 25 qershor rreth orës 18:30, familjarja e saj është paraqitur sërish në stacionin policor, duke njoftuar se vajza ishte kthyer në shtëpi.
Në deklarimin e saj para Qendrës për Punë Sociale dhe hetuesve, e mitura ka treguar se kishte qëndruar për dy ditë në Gjakovë dhe dy ditë në Fushë Kosovë, tek një shoqe e saj, ndërsa ka pranuar se edhe më parë kishte qëndruar për periudha të gjata larg shtëpisë – deri në një apo dy muaj.
Në konsultim me Prokurorin Kujdestar, rasti është mbyllur me raport të veçantë.