Presidenti serb Aleksandar Vuçiq sot është takuar me ambasadorin rus Alexandar Botsan-Kharchenko dhe me këtë rast i është ankuar se “veprimet dhe iniciativat arbitrare të Kosovës dhe draft-rezoluta e Asamblesë së Përgjithshme të OKB-së për Srebrenicën nuk kontribuojnë në asnjë mënyrë në procesin e pajtimit, ndërtimit të besimit dhe bashkëpunimin në rajon”.
Vuçiq ka shkruar në Instagram se në takim është diskutuar për periudhën e vështirë me të cilën po përballet Serbia, për luftën diplomatike në disa fronte dhe për “sfidat serioze me të cilat përballet komuniteti serb në Kosovë por edhe në rajon”.
Ata shkëmbyen mendime për përpjekjet për destabilizimin e rajonit, si dhe përpjekjet e Serbisë për të luftuar në arenën ndërkombëtare për ruajtjen jo vetëm të “interesave të saj shtetërore dhe kombëtare”, por edhe për “respektimin e ligjit ndërkombëtar dhe parimeve në të cilat bazohet rendi botëror”.
“Theksova se është me interes jetik për vendin tonë “që të mbrojë” stabilitetin në rajon dhe theksova se lëvizjet arbitrare të Prishtinës dhe iniciativat siç është draft rezoluta e Asamblesë së Përgjithshme të OKB-së për Srebrenicën nuk kontribuojnë në asnjë mënyrë në procesin e pajtimit, duke ndërtuar besim dhe bashkëpunim në rajon”, ka pretenduar Vuçiqi në llogarinë e tij në Instagram.
Ai edhe njëherë shprehu mirënjohjen për Rusinë për mbështetjen e saj ndaj Serbisë.
“Përsërita mirënjohjen time ndaj Federatës Ruse për qëndrimin e saj të vendosur në lidhje me integritetin territorial të Serbisë, si dhe për respektimin e sovranitetit tonë në aspektin e politikës së pavarur dhe rrugës unike që ka zgjedhur vendi ynë. Kjo rrugë nuk është e lehtë, por ne llogarisim në mbështetjen e plotë të të gjithë miqve të sinqertë të Serbisë”, përfundon presidenti serb