Twitter ka konfirmuar planet për të lejuar përdoruesit të blejnë statusin e verifikuar. Në një përditësim për pajisjet Apple, kompania tha se funksioni do të jetë i hapur për përdoruesit në vende të caktuara që regjistrohen në shërbimin e saj Twitter Blue për 7,99 dollarë (7 £) në muaj.
Ndryshimi i politikës është i diskutueshëm, mes shqetësimeve se platforma mund të mbushet me llogari të rreme, shkruan BBC. Vendimi pason marrjen e Twitter nga Elon Musk, i cili të premten pushoi nga puna rreth gjysmën e fuqisë punëtore të kompanisë.
Tiku blu i kërkuar më parë ishte i disponueshëm vetëm për individë dhe organizata të profilit të lartë ose me ndikim, të cilëve iu kërkua të provonin identitetin e tyre.
Është përdorur si shenjë se një profil është autentik dhe është një mjet kyç për të ndihmuar përdoruesit të identifikojnë informacione të besueshme në platformë.
Musk, personi më i pasur në botë, duket se po kërkon të diversifikojë të ardhurat e Tëitter-it, pas blerjes së firmës në fund të muajit të kaluar pas një marrëveshje prej 44 miliardë dollarësh (39 miliardë paund).
Pak detaje u publikuan në lidhje me ndryshimin në politikën e verifikimit dhe një abonim në Twitter Blue. Përditësimi i Twitter tha se ndryshimet do të zbatohen fillimisht vetëm në MB, SHBA, Kanada, Australi dhe Zelandën e Re.
Por nga postimet e Musk ndryshimet nuk duket se do të zgjasin shumë për tu përhapur në mbarë botën.