Personeli i Regjimentit të Këmbësorisë së Jugut të Forcës Tokësore të Shqipërisë po zhvillon përgatitjet intensive për pjesëmarrje në garën ndërkombëtare ushtarake “Cambrian Patrol”, ndërsa një nga etapat e trajnimit është zhvilluar në Kosovë, në bashkëpunim me Forcën e Sigurisë së Kosovës dhe personel ushtarak britanik.
Sipas njoftimit të Forcës Tokësore të Ushtrisë Shqiptare, trajnimi në Kosovë është fokusuar në rritjen e aftësive profesionale dhe taktike të pjesëmarrësve, si dhe në forcimin e qëndrueshmërisë së tyre fizike dhe mendore.
Bashkëpunimi ndërmjet pjesëtarëve të tri forcave ka shërbyer edhe për rritjen e ndërveprueshmërisë, shkëmbimin e përvojave dhe përgatitjen për skenarët kompleksë me të cilët ekipet do të përballen gjatë garës.
“Cambrian Patrol” është një prej garave më kërkuese ndërkombëtare të patrullimit ushtarak, ku pjesëmarrësit testohen në kushte të vështira dhe përballen me kërkesa të larta në aspektin e aftësive taktike, punës në ekip dhe qëndrueshmërisë fizike e mendore.
Pjesëmarrja shqiptare në këtë garë nuk është e re. Në edicionin e vitit 2025, ekipet e Shqipërisë dhe Kosovës morën pjesë në “Cambrian Patrol”.
Ekipi shqiptar i Regjimentit të Këmbësorisë u rendit në mesin e njësive të vlerësuara me medalje bronzi, ndërsa ekipi i Forcës së Sigurisë së Kosovës fitoi medaljen e argjendtë.
Edicioni i vitit 2026 i “Cambrian Patrol” do të zhvillohet në Mbretërinë e Bashkuar nga 2 deri më 13 tetor.
Për ekipin shqiptar, trajnimi i zhvilluar në Kosovë përbën një etapë të rëndësishme të përgatitjeve para garës, ku aftësitë taktike, puna në ekip dhe rezistenca fizike e mendore do të jenë ndër elementet kryesore të vlerësimit.