Kryeministri i Kosovës, Albin Kurti, ka takuar homologun e tij kroat, Andrej Plenkoviç, në kuadër të Javës së Nivelit të Lartë të Asamblesë së Përgjithshme të Kombeve të Bashkuara në New York.
Gjatë takimit, Kurti ka ngritur edhe çështjen e aktgjykimit të fundit të Dhomave të Specializuara të Kosovës në Hagë ndaj katër ish-krerëve të Ushtrisë Çlirimtare të Kosovës, duke thënë se ai dëshmon, sipas tij, për një “asimetri të padrejtë të përgjegjësisë për luftën” në Kosovë.
“Lidhur me vendimin e Dhomave të Specializuara, theksova asimetrinë e padrejtë të përgjegjësisë për luftën. Gjithashtu trajtuam çështjen e personave të zhdukur dhe varreve të reja masive të zbuluara në Kosovë, si dhe vështirësitë e shkaktuara nga refuzimi i Serbisë për të hapur arkivat e saj. Një temë tjetër e rëndësishme ishte diskriminimi i vazhdueshëm administrativ ndaj shqiptarëve në Luginën e Preshevës”.
Kurti ka theksuar gjithashtu rëndësinë e bashkëpunimit me Kroacinë në fushën e mbrojtjes, si dhe mbështetjen e vazhdueshme të Zagrebit për rrugëtimin e Kosovës drejt Bashkimit Evropian, Këshillit të Evropës dhe integrimit më të gjerë euroatlantik.
Në takim, sipas Kurtit, është diskutuar edhe për sfidat e sigurisë në rajon dhe ndikimin e Rusisë.
“Shkëmbyem mendime rreth sfidave të sigurisë rajonale, ndikimit të Rusisë dhe nevojës për bashkëpunim edhe më të ngushtë ndërmjet vendeve dhe partnerëve tanë”.