Deputetja e Lëvizjes Vetëvendosje nga Lista Guxo, Jeta Statovci ka thënë se sot gjatë ditës së mërkurë në Komisionin për Ekonomi, e kanë mbështetur unanimisht marrëveshjen e Kosovës, me Korporatën e Sfidë së Mijëvjeçarit (MCC).
Përmes një postimi në Facebook, Statovci ka thënë se ky investim i Shteteve të Bashkuara të Amerikës, është investimi më i madh i bërë ndonjëherë në Kosovë.
“Sot, në Komisionin për Ekonomi, mbështetëm unanimisht marrëveshjen me MCC-në. Kjo marrëveshje ndërmjet Republikës së Kosovës dhe Shtetet e Bashkuara të Amerikës shënon investimin më të madh ndonjëherë në historinë e shtetit tonë në fushën e energjetikës, me kontribut në stabilitetin energjetik”, shkroi Statovci.
Në këtë postim, Statovci shprehet e lumtur se nga ky projekt do të përfitojnë edhe gratë.
“Por nga ky projekt, jam e lumtur që do të përfitojnë edhe gratë në sektor. Nga 9% e tyre sa janë të punësuara aktualisht në sektorin e energjisë në Kosovë, që i bie as sa gjysma e mesatares globale; synim dhe qëllim i këtij projekti do të jetë arritja e mesatares globale të përfshirjes së grave në fushën e energjisë sikur në shtetet e tjera”.
Kosova dhe Korporata Sfidës së Mijëvjeçarit (MCC) gjatë ditës së sotme do të nënshkruajnë marrëveshjen për të adresuar furnizimin e Kosovës me energji elektrike përmes investimeve në infrastrukturën e ruajtjes së energjisë.
Kjo marrëveshje është në vlerë prej 236 milionë eurove.
Në faqen e tyre zyrtare, MCC-ja ka njoftuar se ceremonia e nënshkrimit të marrëveshjes do të fillojë nga ora 16:00 deri në 17:30 sipas orës lokale në Washington.
“MCC dhe Qeveria e Kosovës kanë hartuar një marrëveshje për të adresuar furnizimin e Kosovës me energji elektrike përmes investimeve në infrastrukturën e ruajtjes së energjisë dhe programeve të trajnimit Teknik”, thuhet në njoftimin e MCC-së.
Sipas MCC-së, këto investime do të përshpejtojnë tranzicionin e Kosovës drejt një të ardhme më të ‘pastër’ energjetike si dhe do të stimulohet barazia gjinore.
“Këto investime do të përshpejtojnë tranzicionin e Kosovës drejt një të ardhmeje më të pastër energjetike, do të kultivojnë fuqinë punëtore të nevojshme për të mbështetur tranzicionin energjetik të Kosovës, do të stimulojnë praktikimin e barazisë gjinore në firma dhe do të rrisin përfaqësimin e grave në energji dhe sektorët e ngjashëm. Partneriteti MCC-Kosovë do të ketë dy projekte”.
Po ashtu, pjesëmarrës në ceremoni do të jetë Gregory Meeks, kryetar i Komisionit për Punë të Jashtme të Dhomës së Përfaqësuesve bashkë me presidenten Vjosa Osmani, kryeministrin Albin Kurti dhe kryeshefen ekzekutive të MCC-së, Alice Albright.
Bordi i drejtorëve të Korporatës së Sfidës së Mijëvjeçarit (MCC) para disa javësh kanë aprovuar Programin Kompakt të Kosovës me vlerë prej 236.7 milionë dollarësh.
Lidhur më këtë, kryeministri i Kosovës, Albin Kurti ka thënë se ky është investimi më i madh ndonjëherë në sektorin e energjisë.
Presidentja e Kosovës, Vjosa Osmani ka thënë se miratimi i projektit kompakt nga MCC do të ndihmojë në ndërtimin e një sistemi energjie elastike.
Krahas energjisë elastike, Osmani ka thënë se kjo marrëveshje kompakte do të ndikojë edhe fuqinë punëtore profesionale.