Haki Kasumi nga Këshilli Koordinues i familjarëve të Personave të Zhdukur, ka thënë se duhet të bëhet më shumë për të arritur drejtësi për viktimat e luftës së fundit në Kosovë.
Ai ka shtuar se institucionet e Kosovës duhet të grumbullojnë dëshmitë për krimet sa më parë, teksa thotë se Serbia vazhdon të pengojë zgjidhjen e çështjes së personave të zhdukur
“Drejtësia ka bërë një hap, por duhet të bëjë shumë më tepër. Dëshminë e kemi të ekspertit botëror, dëshmitë që janë gjetur, fotografuar e janë shpërndarë në botë, dëshmitë janë o këtu o askund tjetër. Duhet të punojmë, të grumbullojmë faktet tona dhe ta dërgojmë palën serbe atje ku e ka vendin”, ka potencuar ai.
Kasumi është shprehur se çështja e personave të zhdukur duhet të bëhet prioritet.
“Ne duhet të dimë dhe të vendosim që t’i lëmë probleme tjera dhe të merremi me ato që nuk presin, e që armik e kanë humbjen e kohës”, ka thënë ai në emisionin “60 Minuta”.
Edhe pse kanë kaluar 26 vjet, Kasumi ka thënë se për familjarët nuk ka humbur shpresa se ende mund t’i gjejnë të afërmit që u zhdukën gjatë luftës.
Të mërkurën e 15 janarit 2025 janë bërë 26 vjet nga masakra që ndodhi në Reçak të Komunës së Shtimes. Për 45 viktimat e kësaj masakre, të kryer nga forcat serbe, ish-polici Zoran Stanojeviq u dënua me 15 vjet burgim, porse ndodhet në arrati prej vitit 2001. Në mungesë është dënuar edhe Çedomis Aksiqi me 15 vjet burgim.