Shkollat në Filipine rihapen pas një prej mbylljeve më të gjata në botë
Fëmijët e veshur me maska kthehen në shkolla për klasat e tyre pas dy vitesh bllokime për COVID.
Në shkollat në të gjithë vendin të hënën, nxënësit me maska dhe uniforma u rreshtuan për kontrolle të temperaturës ndërsa ktheheshin në klasat e tyre.
Në shkollën fillore Guevara në Manila, e cila kishte mbyllur klasat që nga marsi 2020, nxënësja e klasës së gjashtë, Sophie Macahilig tha se ishte “e emocionuar” për të takuar shokët e klasës dhe mësuesit e saj pas dy vitesh mësimesh në Zoom.
“Dikur argëtoheshim dhe tani mund të argëtohem sërish”, tha 11-vjeçarja për agjencinë e lajmeve AFP.
Filipinet janë një nga vendet e fundit në botë që rifillon mësimet me orar të plotë, personalisht – duke shkaktuar paralajmërime se mbyllja e zgjatur e klasave kishte përkeqësuar një krizë arsimore në vend, raporton AlJazeera.
Vendi ishte ndër më të goditurit nga pandemia në Azinë Juglindore, dhe presidenti i atëhershëm Rodrigo Duterte zbatoi një nga bllokimet më të gjata të Coronavirusit në botë dhe mbylljen e shkollave. Duterte, mandati gjashtëvjeçar i të cilit përfundoi më 30 qershor, kishte refuzuar thirrjet për rihapjen e klasave personalisht për shkak të frikës se mund të ndezë shpërthime të reja.