Numri i furnizuesve të pjesëve të veturave në SHBA, të cilët janë kapur në skandalin e punës me fëmijë është zgjeruar, kjo duke u bazuar tek agjencia e lajmeve Reuters dhe magazina e industrisë së veturave Automotive News.
Është raportuar se të paktën katër kompani amerikane që furnizojnë me pjesë dhe që janë në pronësi të gjigantit koreano-jugor të makinave Hyundai-Kia janë kapur në skandalin që fillimisht u zbulua në korrik të vitit 2022.
Në fillim të këtij viti, autoritetet në SHBA u alarmuan për raste të shumta të përdorimit të punës me fëmijë në një degë të furnizimit me pjesë të gjigantit të makinave Hyundai-Kia, raporton Drive.
Objekti i stampimit të metaleve – i njohur si SMART – ndodhet në Luverne të Alabama-s dhe furnizon linjën e montimit të Hyundai në SHBA për SUV-të si Hyundai Santa Fe dhe Hyundai Tucson, dhe vetura të tjera të këtij grupi.
Hetimi fillestar nga agjencia e lajmeve Reuters zbuloi fëmijë të moshës 12 vjeç të cilët punonin në fabrikën e prodhimit të pjesëve Hyundai-Kia, për të cilën më parë është konstatuar se ka bëre shkelje mbi rregullat e “rreziqeve për shtypje dhe amputim”.
Tani, janë zbuluar detaje të reja në lidhje me shkelje të tjera që përfshijnë furnizues të tjerë të pjesëve të Hyundai-Kia.
Automotive News raportoi gjatë fundjavës se një tjetër furnizues i pjesëve Hyundai-Kia – në pronësi të Hwashin America Corp dhe me qendër në qytetin jugor të Alabamës, Greenville – dyshohet se kishte punësuar një vajzë 14-vjeçare nga Guatemala në fillim të këtij viti te sektori i montimit të komponentëve të trupit të automjetit, kjo duke u bazuar tek intervistat me familjen e saj dhe te raportet nga forcat e zbatimit të ligjit, vënë në dukje mediet amerikane
Mediat me bazë në SHBA thonë se autoritetet kanë hetuar të paktën 10 furnizues pjesësh në Alabama që punojnë për ose janë në pronësi të Hyundai-Kia. Deri më sot, katër nga ato 10 fabrika janë identifikuar se mund të kenë punësuar punëtorë të mitur.