Trepça ’89 pas një viti në Ligën e Parë, ka arritur që matematikisht të sigurojë rikthimin në Superligën e Kosovës për edicionin 2022/23.
Mitrovicasit janë shpallur kampion të Ligës së Parë në Gruin A pas fitores ndaj rivalit lokal Trepça me rezultat 2-0, katër xhiro pa u mbyllur kampionati.
Fitoren ’89-shit ia siguruan golat e realizuara nga Albutrint Morina Albion Pllana.
Skuadra e drejtuar nga Shpëtim Idrizi, ka tubuar 50 pikë, që i bie 12 më shumë se Liria që është e dyta, me të cilën ka edhe rezultate pozitive në përballjet mes tyre.
Trepça ’89 ka fituar gjithçka çka fitohet në futbollin tonë kampion, fitues i Kupës dhe Superkupës. Ata rikthehen në Superligën e Kosovës vetëm pas një viti në Ligën e Parë.
Madje Trepça ’89 ishte skuadra e parë që përfaqësoi Kosovën në garat ndërkombëtare pas pranimit.
‘Minatorët’ kishin rënë sezonin e shkuar nga Superliga në ndeshjen e barazhit ndaj Dukagjinit pas penalltive.
Me rikthimin e Trepçës ’89, rikthehet në skenë edhe një nga skuadrat më të forta që ka pasur elita e futbollit ndër vite, ku shumë talentë kanë dal nga ky klub.
