Qeveria e Kosovës i ka reaguar shteteve të QUINT-it të cilët nuk u pajtuan rreth vendimit për shpronësimin në veri të Kosovës.
Në njoftimin e ekzekutivit thuhet se shprehin keqardhje për Deklaratën e shteteve të QUINT-it, Bashkimit Evropian dhe Organizatës për Bashkëpunim dhe Siguri në Evropë (OSBE), lidhur me vendimin e datës 30 maj mbi shpronësimin e pronës së paluajtshme në disa komuna në veri të Kosovës.
“Deklarata në fjalë, konstaton në mënyrë të gabuar gjendjen faktike dhe bën vlerësim ligjor të pabazuar në argumente”, thuhet ndër tjerash në njoftim.
Tutje në reagim theksohet se me propozim të Ministrisë së Mjedisit, Planifikimit Hapësinor dhe Infrastrukturës, ka filluar procesin e shpronësimit të pronës së paluajtshme në disa komuna të Republikës së Kosovës sipas Ligjit në fuqi për Shpronësimin, me qëllim të ndërtimit të projekteve infrastrukturore.